नर्वेमा परिवार कसरी ल्याउने? पारिवारिक आप्रवासन सम्बन्धी जानकारी

नर्वेमा बसोबास गर्ने व्यक्तिले आफ्नो परिवारका सदस्यहरूलाई यहाँ स्थायी रूपमा बस्न वा भेटघाट गर्न ल्याउने प्रक्रियालाई पारिवारिक आप्रवासन (Familieinnvandring) भनिन्छ।

नर्वेमा बस्ने व्यक्तिको नागरिकता, भिसाको हैसियत र आवेदन दिने व्यक्तिको अवस्थाअनुसार यसका नियमहरू फरक पर्छन्।

नियमहरूलाई सजिलै बुझ्न निम्न ५ भागमा वर्गीकरण गरिएको छ:

भाग १: स्थायी पारिवारिक आप्रवासन (सामान्य नियम)

(नर्वेजियन नागरिक, स्थायी बसोबास वा काम/अध्ययन भिसा हुनेहरूका लागि)

अधिकांश नेपाली विद्यार्थी र कामदारहरू यही नियमअन्तर्गत पर्दछन्। यसअनुसार निम्न परिवारका सदस्यहरूलाई स्थायी रूपमा नर्वे ल्याउन सकिन्छ:

• पति/पत्नी (Ektefelle): कानुनी रूपमा विवाह दर्ता भएको हुनुपर्छ। सामान्यतया दुवै जना कम्तीमा २४ वर्ष पुगेको हुनुपर्ने नियम लागू हुन्छ, यद्यपि यसमा केही अपवादहरू हुन सक्छन्।
• सँगै बस्ने जीवनसाथी (Samboer): कम्तीमा २ वर्षदेखि सँगै बसेको आधिकारिक प्रमाण हुनुपर्छ, वा दुवैको साझा सन्तान भएको हुनुपर्छ।
• १८ वर्षमुनिका सन्तान: नर्वेमा रहेका आमा वा बुबासँग बस्नका लागि।
• ६० वर्षमाथिका एक्ला अभिभावक: यदि तपाईंको आमा वा बुबाको उमेर ६० वर्षभन्दा माथि छ, उहाँका पति/पत्नी हुनुहुन्न र नेपालमा हेरचाह गर्ने अन्य कुनै सन्तान वा नातिनातिना छैनन् भने उहाँलाई स्थायी रूपमै नर्वे ल्याउन सकिन्छ।

मुख्य सर्तहरू:

• आम्दानी (Underholdskrav): नर्वेमा बस्ने व्यक्तिले UDI ले तोकेको न्यूनतम वार्षिक आय अघिल्लो वर्ष पनि कमाएको र आगामी वर्ष पनि कमाउने सुनिश्चित हुनुपर्छ (यो रकम UDI ले हरेक वर्ष परिमार्जन गर्छ)।
• आर्थिक सहायता नलिएको: पछिल्लो १२ महिनामा NAV बाट सामाजिक सहायता (Sosialhjelp) नलिएको हुनुपर्छ।

• महत्त्वपूर्ण जानकारी: आमा वा बुवालाई ल्याउने हकमा नर्वेमा रहेका मुख्य निवेदकको आफ्नै आम्दानी तोकिएको सीमासम्म पुग्दैन भने, सँगै बसेका ज्वाइँ वा बुहारीले पनि आफ्नो आम्दानी देखाएर आर्थिक ग्यारेन्टी बस्न पाउने कानुनी व्यवस्था छ।

भाग २: युरोपेली युनियन (EU/EEA) को नागरिकता हुनेहरूका लागि
यदि तपाईंले पोर्चुगल, स्पेन, पोल्यान्ड वा अन्य कुनै EU/EEA देशको नागरिकता लिनुभएको छ र नर्वेमा काम गर्दै वा बस्दै हुनुहुन्छ भने, तपाईंको परिवारका लागि नियम निकै सहज छ।

• फाइदाहरू: UDI लाई कुनै आवेदन शुल्क तिर्नुपर्दैन, तोकिएको कडा आम्दानी सीमा लागू हुँदैन, र २४ वर्षे उमेरको सर्त पनि लाग्दैन।
• कसलाई ल्याउन पाइन्छ?: पति/पत्नी, २१ वर्षमुनिका सन्तान, र विशेष अवस्थामा पूर्ण रूपमा आश्रित रहेका २१ वर्षमाथिका सन्तान वा आमा-बुबा।

भाग ३: नर्वेबाटै आवेदन दिन पाउने विशेष नियम (Skilled workers)
सामान्यतया पारिवारिक भिसाका लागि नेपालबाटै आवेदन दिनुपर्छ र निर्णय नआउन्जेल उतै पर्खिनुपर्छ। तर, UDI ले दक्ष जनशक्ति (skilled workers) लाई विशेष छुट दिएको छ।

• यदि नेपालबाट आउने आवेदकसँग विश्वविद्यालयको डिग्री (ब्याचलर, मास्टर) वा विशेष प्राविधिक योग्यता छ भने, उहाँले पर्यटक भिसा मा नर्वे आएर नर्वेबाटै पारिवारिक भिसा एप्लाई गर्न पाउनुहुन्छ।
• सर्त: आवेदन दिने दिनसम्म पर्यटक भिसाको म्याद कानुनी रूपमा बाँकी नै हुनुपर्छ।
• फाइदा: आवेदन बुझाइसकेपछि UDI को निर्णय नआउन्जेल कानुनी रूपमा नर्वेमै बस्न पाइन्छ।

भाग ४: नर्वेमै आएर विवाह गर्ने भिसा (Forlovelsestillatelse)
नेपालमा रहेका आफ्नो प्रेमी/प्रेमिका वा मगनी भएका व्यक्तिलाई नर्वेमै ल्याएर विवाह गर्न चाहनुहुन्छ भने यो भिसा एप्लाई गर्न सकिन्छ।

• यो भिसा ६ महिनाका लागि दिइन्छ। नर्वे आएको ६ महिनाभित्र कानुनी रूपमा विवाह गरिसक्नुपर्छ।
• विवाहपछि नेपाल नफर्कीकनै नर्वेबाटै स्थायी पारिवारिक भिसा (भाग १) का लागि आवेदन दिन पाइन्छ।

भाग ५: आमाबुबालाई ९ महिनासम्म नर्वे ल्याउने भिसा
आमाबुबालाई लामो समय सँगै राख्नका लागि यो भिसा सबैभन्दा धेरै प्रयोग गरिन्छ।

• अवधि र सर्त: यो बढीमा ९ महिनाका लागि दिइन्छ। म्याद सकिएपछि अनिवार्य नेपाल फर्किनुपर्छ र यस अवधिमा नर्वेमा काम गर्न पाइँदैन।
• ग्यारेन्टी: सन्तानले आमाबुबाको सम्पूर्ण खर्च व्यहोर्ने ग्यारेन्टी दिनुपर्छ।
• पुनः आवेदन: नेपाल फर्किएपछि, फेरि यस्तै ९ महिने भिसा पाउन सामान्यतया १ वर्ष नेपालमै बसेको (नर्वे बाहिर रहेको) हुनुपर्छ। यद्यपि, छोटो अवधिको सामान्य भिजिट भिसा भने त्यसअघि नै एप्लाई गर्न सकिन्छ।

आवेदन प्रक्रिया र आवश्यक कागजात

महत्त्वपूर्ण कागजातहरू: राहदानी, जन्म दर्ता र विवाह दर्ता।
आवेदकले ध्यान दिनुपर्ने: नेपालबाट बनेका सरकारी कागजातहरू परराष्ट्र मन्त्रालय (MoFA) बाट प्रमाणित भएको र त्यसपछि नेपालस्थित नर्वेजियन दूतावास (वा VFS मार्फत) Legalize भएको हुनु अनिवार्य छ।

त्यसैगरी, नर्वेमा रहेको व्यक्तिको राहदानी/बसोबास कार्ड, रोजगार सम्झौता, पछिल्ला ३ महिनाको तलबको रसिद र कर विवरण आवश्यक पर्छ।

कहाँ र कसरी आवेदन बुझाउने?
१. UDI को अनलाइन पोर्टलमा फारम भरी तोकिएको शुल्क बुझाउनुहोस्।
२. नेपालबाट गर्दा: नेपालमा रहेका परिवारका सदस्यले सक्कल कागजात र बायोमेट्रिक्स बुझाउन काठमाडौंस्थित VFS Global को अपोइन्टमेन्ट लिनुपर्छ।
३. नर्वेबाट गर्दा (भाग ३ र EU नागरिकका परिवारको हकमा): नर्वेमै रहेको स्थानीय प्रहरी (Politiet/SUA) मा अपोइन्टमेन्ट लिएर कागजात बुझाउन सकिन्छ।

महत्त्वपूर्ण: नियम र आम्दानीको सीमा समय-समयमा परिवर्तन भइरहने हुँदा आवेदन दर्ता गर्नुअघि सधैं आधिकारिक वेबसाइट UDI.no मा पछिल्लो जानकारी जाँच गर्नुहोला।