UDI ले भिजिटर भिसासम्बन्धी प्रश्नका लागि इमेल र केस वर्करसँगको लाइभ च्याट सेवा पुनः सञ्चालनमा ल्याएको छ।
गर्मी बिदाका कारण जुन २२ देखि अगस्ट ७ सम्म सीमित गरिएको उक्त सेवा अगस्ट १० देखि पुनः खुलेको हो। यस अवधिमा इमेल पठाउने सुविधा र केस वर्करसँगको लाइभ च्याट बन्द रहे पनि स्वचालित च्याटबट (chatbot) भने चौबीसै घण्टा उपलब्ध थियो।
यो सम्पर्क सेवा नर्वेमा अधिकतम ९० दिनसम्मको छोटो भ्रमणका लागि प्रयोग हुने भिजिटर भिसासम्बन्धी प्रश्नका लागि हो। UDI का अनुसार भिजिटर भिसामा अधिकतम ९० दिन नर्वे भ्रमण गर्न सकिन्छ र यस्तो भिसा सबै सेन्जेन (Schengen) मुलुकमा प्रवेशका लागि मान्य हुन्छ।
लाइभ च्याट कसरी उपलब्ध हुन्छ?
UDI को सम्पर्क पृष्ठमा च्याट सुरु गर्दा प्रयोगकर्ताले सबैभन्दा पहिले स्वचालित च्याटबट भेट्छन्। च्याटबटले उत्तर दिन नसकेको अवस्थामा सोमबार, मंगलबार, बिहीबार र शुक्रबार बिहान १० बजेदेखि दिउँसो २:३० बजेसम्म केस वर्करसँग च्याट गर्न अनुरोध गर्न सकिन्छ।
बुधबार UDI को सूचना सेवा बन्द रहन्छ। च्याटबट भने हप्ताको सातै दिन चौबिसै घण्टा उपलब्ध हुन्छ।
इमेलका लागि अनलाइन सम्पर्क फारम
भिजिटर भिसासम्बन्धी प्रश्न इमेलमार्फत पठाउन UDI को अनलाइन सम्पर्क फारम प्रयोग गर्न सकिन्छ। तर सोमबार, मंगलबार, बिहीबार र शुक्रबार बिहान १० बजेदेखि दिउँसो २:३० बजेसम्म उक्त फारमबाट इमेल पठाउन मिल्दैन। त्यस समयमा लाइभ च्याट वा टेलिफोन सेवा प्रयोग गर्न सकिन्छ।
प्राप्त प्रश्नको सङ्ख्याका आधारमा इमेलको जवाफ आउन केही समय लाग्न सक्ने UDI ले जनाएको छ। मार्गदर्शन र सहायता नर्वेजियन तथा अंग्रेजी भाषामा उपलब्ध हुन्छ।
आवेदन कहाँ पुगेको छ भन्ने बुझ्नु महत्त्वपूर्ण
सबै भिजिटर भिसा आवेदन UDI ले प्रत्यक्ष रूपमा प्रक्रिया गर्दैन। अधिकांश आवेदन आवेदक बसोबास गर्ने देशको नर्वेजियन दूतावास वा अर्को देशमा रहेको सम्बन्धित दूतावासले हेर्छ। दूतावास आवेदनबारे अनिश्चित भएमा मात्र आवेदन UDI मा पठाउन सक्छ।
आफ्नो आवेदन UDI मा पठाइएको सूचना प्राप्त नभएको अवस्थामा आवेदन अझै दूतावासमै प्रक्रियामा रहेको हुन सक्छ। यस्तो आवेदनबारे UDI ले जवाफ दिन नसक्ने भएकाले सम्बन्धित दूतावाससँग सम्पर्क गर्नुपर्छ।
त्यसैले नेपालबाट आवेदन दिएका व्यक्तिले आफ्नो आवेदन UDI मा पठाइएको सूचना प्राप्त भएको छ कि छैन भन्ने पहिले जाँच गर्नु उपयोगी हुन्छ। आवेदन नयाँ दिल्ली दूतावास या भिसा आवेदन केन्द्रको प्रक्रियामै रहेको अवस्थामा प्रश्न सम्बन्धित दूतावास वा आवेदन केन्द्रतर्फ पठाउनुपर्ने हुन सक्छ।
नर्वेमा बस्ने व्यक्तिले नेपालबाट आफन्त वा परिवारका सदस्यलाई भ्रमणका लागि बोलाउँदा आवश्यक कागजात, आमन्त्रण, आर्थिक प्रत्याभूति वा आवेदन प्रक्रियाबारे प्रश्न हुन सक्छ। UDI ले भिजिटर भिसा आवेदन गर्न चाहने, आवेदन दिइसकेका र निर्णय प्राप्त गरिसकेका व्यक्तिका लागि छुट्टाछुट्टै प्रायः सोधिने प्रश्नहरूको सूची उपलब्ध गराएको छ। त्यसमा आमन्त्रण गर्ने व्यक्तिले पठाउनुपर्ने कागजात, प्रायोजकको अर्थ, पावर अफ अटर्नी, आवेदन संशोधन, प्रक्रियाको अवस्था र अस्वीकृतिपछिको पुनरावेदनसम्बन्धी विषय समावेश छन्।
सम्पर्क गर्नुअघि आवेदनको अवस्था, आवेदकको विवरण र प्राप्त सूचना तयार राख्दा आफ्नो प्रश्न स्पष्ट रूपमा प्रस्तुत गर्न सहज हुन सक्छ। तर च्याट वा इमेल सेवा खुलेको अर्थ आवेदन छिटो प्रक्रिया हुने वा तुरुन्त निर्णय प्राप्त हुने भन्ने होइन। UDI ले सम्पर्क गरे पनि निर्णय आउने ठ्याक्कै मिति बताउन नसक्ने र प्रतीक्षा समयबारे उपलब्ध अनलाइन जानकारीभन्दा थप विवरण दिन नसक्ने जनाएको छ।
सम्पर्क कहाँ गर्ने?
भिजिटर भिसासम्बन्धी प्रश्नका लागि UDI को आधिकारिक सम्पर्क पृष्ठमा गएर “visitor visa, maximum 90 days” विकल्प छान्न सकिन्छ। आवश्यक विकल्पहरू छनोट गरेपछि प्रयोगकर्ताले आफ्नो अवस्थाअनुसार उपलब्ध च्याट, इमेल वा टेलिफोन सम्पर्क जानकारी प्राप्त गर्न सक्छन्।