नर्वेमा नेट्फ्लिक्स, टिभी टू प्ले , म्याक्स (पहिलेको एचबीओ म्याक्स), र डिज्नी प्लस जस्ता स्ट्रिमिङ सेवाहरूको मूल्य लगातार बढिरहेको छ।
केही सेवा प्रदायकहरूले सदस्यता शुल्क महँगो बनाउनुका साथै सामग्रीको बीचमा विज्ञापन देखाउन थालेका छन्। यसका अतिरिक्त, एउटै खाता घरबाहिरका व्यक्तिसँग बाँड्ने सुविधामा पनि रोक लगाइएको छ।
उपभोक्ता अधिकारसम्बन्धी संस्था Forbrukerrådet का अनुसार, मूल्य बढे पनि ग्राहकले पाउने सेवाको गुणस्तर भने पहिलेभन्दा राम्रो भएको छैन। संस्थाका वरिष्ठ सल्लाहकार थोमस इभर्सन (Thomas Iversen) ले नर्वेमा उपलब्ध स्ट्रिमिङ सेवाको मूल्य पछिल्ला वर्षहरूमा निरन्तर बढेको, तर ग्राहकका लागि उपलब्ध सामग्री र सुविधा भने कमजोर हुँदै गएको बताएका छन्।
मूल्य बढ्ने तर सेवाको गुणस्तर वा सुविधा घट्ने यो अवस्थालाई अंग्रेजीमा "स्ट्रिमफ्लेसन" (Streamflation) भनिन थालिएको छ।
नर्वेका अधिकांश मानिससँग स्ट्रिमिङ सदस्यता
नर्वेको केन्द्रीय तथ्याङ्क विभाग (SSB) को तथ्याङ्कअनुसार सन् २०२५ सम्ममा नर्वेका करिब ९० प्रतिशत मानिसले कम्तीमापनि एउटा स्ट्रिमिङ सेवाको सदस्यता लिएका थिए। सन् २०२० मा यस्तो सदस्यता लिनेको हिस्सा ७१ प्रतिशत मात्र थियो।
यति धेरै घरपरिवारले स्ट्रिमिङ सेवा प्रयोग गर्ने भएकाले एउटा सेवामा हुने सानो मूल्यवृद्धि सामान्य जस्तो लाग्न सक्छ। तर एउटै परिवारले नेटफ्लिक्स, टिभी टू प्ले, डिज्नी प्लस, म्याक्स, भियाप्ले जस्ता धेरै सेवा प्रयोग गरिरहेको अवस्थामा कुल मासिक खर्च निकै ठूलो हुन सक्छ।
कुन सेवाको मूल्य कति बढ्यो?
यस वर्ष र पछिल्लो अवधिमा विभिन्न सेवाहरूमा देखिएको मूल्य परिवर्तन यस प्रकार छ:
- नेट्फ्लिक्स (Netflix): आधारभूत (Basic) सदस्यताको मूल्य ९९ क्रोनरबाट बढेर मासिक ११९ क्रोनर पुगेको छ।
- टिभी टू प्ले (TV 2 Play): विज्ञापनसहितको स्ट्यान्डर्ड सदस्यता सेप्टेम्बर १ देखि १८९ क्रोनरबाट बढेर १९९ क्रोनर पुगेको छ।
- म्याक्स (Max): स्ट्यान्डर्ड सदस्यताको मूल्य मासिक १२९ क्रोनरबाट बढाएर १४९ क्रोनर पुर्याइएको छ। (एचबीओ म्याक्स नर्वेमा अब 'म्याक्स' को नामले सञ्चालित छ)
- डिज्नी प्लस (Disney+): विज्ञापनसहितको स्ट्यान्डर्ड अफर अक्टोबर १४ देखि ६९ क्रोनरबाट बढेर ७९ क्रोनर पुग्नेछ। छ महिनाको सम्झौता अवधि सकिएपछि यसको मूल्य मासिक ८९ क्रोनर हुनेछ।
- एप्पल टिभी प्लस (Apple TV+): सदस्यताको मूल्य ९९ क्रोनरबाट बढाएर ११९ क्रोनर बनाइएको छ।
- भियाप्ले (Viaplay): सबैभन्दा सस्तो सदस्यता मासिक १०९ क्रोनर रहेको छ।
- प्राइम भिडियो (Prime Video): सदस्यता मासिक ७९ क्रोनर छ, तर यस वर्षको जुन महिनादेखि यसमा विज्ञापन थपिएको छ।
(नोट: यी मूल्यहरू सामान्यतया सम्बन्धित सेवाको सबैभन्दा सस्तो सदस्यतामा आधारित छन्, जसमा विज्ञापन देखाइने व्यवस्था हुन सक्छ।)
मूल्य बढे पनि सदस्यता रद्द गर्ने प्रवृत्ति कम
मूल्यवृद्धि, विज्ञापन र सामग्रीको सङ्ख्यामा आएको कमीका बाबजुद नर्वेका ग्राहकले ठूलो सङ्ख्यामा सदस्यता रद्द गरेको संकेत अहिलेसम्म नदेखिएको इभर्सनले बताएका छन्।
नर्वेजियन बिजनेस स्कुल बीआई (BI) का सहप्राध्यापक तार्ये कोल्ब्योर्नसेन (Terje Kolbjørnsen) का अनुसार, आफूले हेर्न चाहेको विशेष कार्यक्रम वा खेलकुद कुनै निश्चित सेवामा मात्र उपलब्ध हुँदा ग्राहक त्यही सेवामा रहन बाध्य हुन्छन्। सदस्यताको रकम बैंक खाताबाट स्वचालित रूपमा काटिने भएकाले पनि धेरै मानिसले यसको मूल्य बारम्बार जाँच गर्दैनन्।
प्रयोग नगर्ने सदस्यता जाँच गर्न विज्ञको सुझाव
विशेषज्ञहरूले आफ्नो बैंक खाता वा कार्डबाट नियमित रूपमा काटिने स्ट्रिमिङ सदस्यता जाँच गर्न सुझाव दिएका छन्। केही महिना प्रयोग नभएको सेवा रद्द गर्दा वार्षिक रूपमा उल्लेख्य रकम बचाउन सकिन्छ।
परिवारले यी कुराहरू जाँच गर्न सक्छन्:
- अहिले कुन-कुन स्ट्रिमिङ सेवाको पैसा तिरिँदै छ?
- ती सेवाहरू वास्तवमै नियमित प्रयोग भइरहेका छन् कि छैनन्?
- एउटै प्रकारको सामग्रीका लागि धेरै सेवा लिइएको छ कि छैन?
- विज्ञापनरहित सुविधाका लागि अतिरिक्त रकम तिर्नु आवश्यक छ कि छैन?
- आवश्यक कार्यक्रम वा सिजन आएको बेला मात्र सदस्यता लिएर पछि रद्द गर्न सकिन्छ कि सकिँदैन?
प्रयोग नगर्ने सदस्यता रद्द गर्न बिर्सँदा थोरैथोरै देखिने मासिक रकम वर्षभरिमा ठूलो खर्च बन्न सक्छ।