नर्वे सरकारले विद्युतीय स्कुटर (elsparkesykkel) चलाउने न्यूनतम उमेर १२ वर्षबाट बढाएर १६ वर्ष पुर्याउने प्रस्ताव गरेको छ। बालबालिका तथा किशोरकिशोरीहरू विद्युतीय स्कुटर दुर्घटनामा पर्ने क्रम बढेपछि सरकारले यो नियम कडा बनाउने तयारी गरेको हो
सरकारले सडक विभाग (Statens vegvesen) लाई यो प्रस्ताव सार्वजनिक परामर्श मा पठाउन भनेको छ। सार्वजनिक परामर्श र आवश्यक कानुनी प्रक्रिया पूरा भएपछि मात्र नयाँ नियम लागू हुन सक्छ। तसर्थ, हाल विद्युतीय स्कुटर चलाउने कानुनी न्यूनतम उमेर १२ वर्ष नै कायम छ।
सरकारका अनुसार सन् २०२४ देखि २०२६ सम्म विद्युतीय स्कुटर दुर्घटनामा घाइते हुने बालबालिका तथा किशोरकिशोरीको संख्या उल्लेख्य रूपमा बढेको छ।
विशेषगरी १२ देखि १६ वर्ष उमेर समूहका धेरै व्यक्तिहरू यस्ता दुर्घटनामा परेका छन्।
Statens vegvesen को अध्ययनले कम उमेरका प्रयोगकर्ताहरूसँग जटिल ट्राफिक अवस्था बुझ्ने अनुभव र ज्ञान सीमित हुन सक्ने देखाएको छ।
अध्ययनअनुसार १४ र १५ वर्षका प्रयोगकर्ताहरू तीव्र गति तथा जोखिमपूर्ण रूपमा चलाइएका विद्युतीय स्कुटरसँग सम्बन्धित दुर्घटनामा बढी देखिएका छन्।
नर्वेमा विद्युतीय स्कुटर चलाउँदा अधिकतम गति प्रतिघण्टा २० किलोमिटर हुनुपर्छ। हाल १५ वर्षमुनिका प्रयोगकर्ताले अनिवार्य रूपमा हेल्मेट लगाउनुपर्छ।
विद्युतीय स्कुटरमा अर्को व्यक्तिलाई यात्रुका रूपमा राख्न पाइँदैन र प्रयोगका लागि जिम्मेवारी बीमा (Ansvarsforsikring) पनि अनिवार्य छ।
केही भाडामा विद्युतीय स्कुटर उपलब्ध गराउने कम्पनीहरूले यसअघि नै आफ्ना सेवामा १५ वा १६ वर्षको न्यूनतम उमेर सीमा तोकिसकेका छन्। तर, सरकारको यो प्रस्ताव स्वीकृत भएमा १६ वर्षको उमेर सीमा निजी तथा भाडाका सबै विद्युतीय स्कुटरहरूमा अनिवार्य रूपमा लागू हुनेछ।