ओस्लो, २७ अगस्ट २०२६
नर्वेका राजा हाराल पाँचौँको स्वास्थ्य अवस्था थप बिग्रिएको छ। नर्वेको राजदरबारले बिहीबार बिहान सार्वजनिक गरेको संक्षिप्त विज्ञप्तिमा ८९ वर्षीय राजाको स्वास्थ्य अवस्था अहिले“अत्यन्त गम्भीर” रहेको जनाएको छ। अवस्था गम्भीर भएपछि कार्यवाहक राष्ट्रप्रमुखको जिम्मेवारी सम्हालिरहेका युवराज होकोन र रानी सोन्याले आफ्ना सबै निर्धारित कार्यक्रम रद्द गरेका छन्।
राजा हाराल अगस्ट १७ देखि ओस्लोस्थित रिक्सहोस्पितालेमा भर्ना भएर उपचार गराइरहेका छन्। राजदरबारका अनुसार उनलाई पछिल्ला केही सातादेखि रगतसम्बन्धी रोग हेमोलाइटिक एनिमिया को उपचारका लागि कोर्टिसोन दिइएको थियो। औषधिको उपचारपछि शरीरमा तरल पदार्थ जम्मा भएपछि उनलाई अस्पताल भर्ना गरिएको थियो।
अगस्ट २३ मा राजदरबारले राजाको स्वास्थ्य अवस्था सप्ताहन्तमा बिग्रिएको र रगतमा ब्याक्टेरियाको संक्रमण देखिएपछि एन्टिबायोटिक औषधि दिइएको जानकारी दिएको थियो। त्यसबेला उनले उपचारमा प्रतिक्रिया दिएको र अवस्था स्थिर रहेको बताइएको थियो। अगस्ट २४ सम्म पनि अवस्थामा उल्लेखनीय परिवर्तन नभएको जनाइएको थियो। तर बिहीबार, अगस्ट २७ मा आएको नयाँ आधिकारिक सूचनाले अवस्था पुनः बिग्रिएको र अत्यन्त गम्भीर बनेको पुष्टि गरेको छ।
राजपरिवार अस्पतालमा
राजाको स्वास्थ्य अवस्था गम्भीर बनेपछि राजपरिवारका सदस्यहरू रिक्सहोस्पिताले पुगेका छन्। रानी सोन्या, युवराज होकोन, युवराज्ञी मेत्ते-मारीत, राजकुमारी इन्ग्री आलेक्सान्द्रा, राजकुमार स्वेरे माग्नुस र राजकुमारी मेर्टा लुइसे लगायत परिवारका सदस्यहरू अस्पताल पुगेको नर्वेली सञ्चारमाध्यमहरूले जनाएका छन्। राजाकी दिदी राजकुमारी आस्त्री पनि बिहीबार अस्पताल पुगेकी थिइन्।
राजदरबारले राजाको स्वास्थ्य अवस्थाबारे विस्तृत चिकित्सा विवरण सार्वजनिक गरेको छैन। परिवारका सदस्यहरू अस्पतालमा एकत्रित भएको र रानी तथा युवराजले सम्पूर्ण कार्यक्रम रद्द गरेको घटनालाई नर्वेली सञ्चारमाध्यमहरूले परिस्थितिको गम्भीरताको संकेतका रूपमा उल्लेख गरेका छन्। तर राजदरबारबाट थप आधिकारिक जानकारी नआएसम्म स्वास्थ्य अवस्थाबारे अनुमान नगर्नु उपयुक्त हुने विशेषज्ञहरूले बताएका छन्।
देशभरबाट शुभेच्छा
राजाको अवस्था गम्भीर भएको समाचार आएपछि ओस्लोस्थित राजदरबार अगाडिको Slottsplassen मा मानिसहरू भेला हुन थालेका छन्। केहीले फूल चढाएका छन् भने केहीले राजा र राजपरिवारप्रति सम्मान तथा समर्थन प्रकट गरेका छन्। धेरै नर्वेलीहरूका लागि राजा हाराल राष्ट्रिय एकता र स्थिरताको प्रतीक मानिन्छन्।
प्रधानमन्त्री योनास गार स्तोरेले राजाको स्वास्थ्य अवस्था बिग्रिएको समाचारले आफूलाई गहिरो रूपमा प्रभावित बनाएको बताएका छन्। उनले सम्पूर्ण देशका तर्फबाट राजा र राजपरिवारप्रति न्यानो भावना व्यक्त गर्दै राजाले रिक्सहोस्पितालेतमा राम्रो र जिम्मेवार उपचार पाइरहेको विश्वास व्यक्त गरेका छन्। राजाको अवस्थाका कारण प्रधानमन्त्री स्तोरेले जर्मनीको निर्धारित भ्रमणसमेत रद्द गरेका छन्।
नर्वेली संसदका अध्यक्ष मासुद घराहखानीले पनि आइसल्यान्डको आफ्नो कार्यक्रम छोट्याएर नर्वे फर्किने निर्णय गरेका छन्। यससँगै विभिन्न राजनीतिक दलका नेताहरू र सार्वजनिक व्यक्तिहरूले राजा र राजपरिवारप्रति शुभेच्छा व्यक्त गरिरहेका छन्।
युवराज होकोन कार्यवाहक राष्ट्रप्रमुख
राजा हाराल बिरामी बिदामा रहेकाले युवराज होकोनले कार्यवाहक राष्ट्रप्रमुख, अर्थात् राजप्रतिनिधि का रूपमा संवैधानिक जिम्मेवारी सम्हालिरहेका छन्। राजाको अनुपस्थितिमा आवश्यक औपचारिक तथा संवैधानिक कार्य युवराजले सम्पादन गर्नेछन्।
राजा हाराल सन् १९९१ देखि नर्वेका राजा छन्। उमेर र स्वास्थ्य अवस्थालाई ध्यानमा राख्दै उनले पछिल्ला वर्षहरूमा आफ्नो आधिकारिक कार्यक्रमको संख्या घटाएका थिए। यद्यपि उनले राजाको जिम्मेवारीबाट स्वेच्छाले अलग हुने सम्भावनालाई अस्वीकार गर्दै संसद्सामु गरेको शपथ जीवनभरका लागि भएको बताएका थिए।
राजदरबार वा अस्पतालबाट राजाको स्वास्थ्यबारे थप आधिकारिक जानकारी आएमा यो समाचार अद्यावधिक गरिनेछ।
पछिल्लो अद्यावधिक: २७ अगस्ट २०२६, अपराह्न