नर्वे सरकारले नयाँ विद्युतीय गाडीमा दिइँदै आएको मूल्य अभिवृद्धि कर (Merverdiavgift - MVA) छुटको सीमा घटाउने प्रस्ताव गरेको छ। यो प्रस्ताव संसदबाट पारित भएमा, सन् २०२७ देखि नयाँ विद्युतीय गाडी किन्दा अहिलेको तुलनामा ३७,५०० क्रोनरसम्म बढी कर तिर्नुपर्ने हुन सक्छ।
हाल नयाँ विद्युतीय गाडी किन्दा पहिलो ३ लाख क्रोनरसम्मको मूल्यमा MVA पूर्ण रूपमा छुट छ। तर, नयाँ प्रस्तावअनुसार सरकारले यो सीमालाई घटाएर १ लाख ५० हजार क्रोनरमा झार्न खोजेको छ।
यसको अर्थ, गाडीको १ लाख ५० हजार क्रोनरभन्दा माथिको मूल्यमा भने अब २५ प्रतिशत MVA लाग्नेछ।
उदाहरणका लागि, यदि कुनै नयाँ विद्युतीय गाडीको मूल्य ३ लाख क्रोनर छ भने अहिले त्यसमा MVA लाग्दैन। तर नयाँ नियम लागू भएमा पहिलो १ लाख ५० हजार क्रोनरमा छुट पाइनेछ भने बाँकी १ लाख ५० हजार क्रोनरमा २५ प्रतिशत MVA लाग्नेछ।
यसले गर्दा गाडीको मूल्यमा सिधै ३७,५०० क्रोनर कर थपिनेछ।
यसैकारण, सन् २०२६ को तुलनामा कम्तीमा ३ लाख क्रोनर मूल्य पर्ने नयाँ विद्युतीय गाडीहरू ३७,५०० क्रोनरसम्म महँगो पर्न सक्ने देखिएको हो।
यद्यपि, गाडीको अन्तिम बिक्री मूल्य उत्पादक तथा विक्रेताको आफ्नै मूल्य निर्धारण नीतिमा पनि भर पर्ने भएकाले, कर बढेजति नै गाडीको भाउ ठ्याक्कै बढ्छ भन्ने निश्चित भने हुँदैन।
यसअघि सरकारले सन् २०२६ मा पनि विद्युतीय गाडीमा पाइने MVA छुटको सीमा ५ लाख क्रोनरबाट घटाएर ३ लाख क्रोनरमा झारेको थियो। नर्वेको नयाँ गाडीको बजारमा विद्युतीय गाडीले अधिकांश हिस्सा ओगटिसकेको हुनाले, सरकारले क्रमिक रूपमा यस्तो कर छुटलाई घटाउँदै लगेको हो।
सुरुमा सरकारले सन् २०२७ देखि विद्युतीय गाडीको MVA छुट पूर्ण रूपमै हटाउने संकेत गरेको थियो। तर, नयाँ बजेट प्रस्तावमा यसलाई पूरै हटाउनुको सट्टा १ लाख ५० हजार क्रोनरसम्मको छुटलाई भने कायमै राख्ने प्रस्ताव गरिएको छ।
सरकारको अनुमानअनुसार यो नयाँ व्यवस्था लागू भएमा सन् २०२७ मा राज्यलाई करिब ३.८ अर्ब क्रोनर थप राजस्व प्राप्त हुनेछ।
यो विषय सन् २०२७ को राष्ट्रिय बजेट प्रस्तावको एउटा अंश मात्र भएकाले, संसदमा हुने छलफल र दलहरूबीचको बजेट वार्ताका क्रममा यसमा परिमार्जन हुन सक्ने सम्भावना भने रहन्छ।