नर्वेमा सन् २०२५ मा अपाङ्गता भत्ता (uføretrygd) प्राप्त गरेका करिब ३६ हजार ८०० जनालाई NAV ले आज (अक्टोबर २०) देखि वार्षिक हिसाब मिलानसम्बन्धी पत्र पठाउँदैछ। यसमध्ये करिब १८ हजार ९०० जनाले बढी पाएको रकम फिर्ता गर्नुपर्नेछ भने १७ हजार ९०० जनाले NAV बाट थप रकम पाउनेछन्।
NAV ले अपाङ्गता भत्ता पाउने व्यक्तिहरूको अघिल्लो वर्षको वास्तविक आम्दानी र भत्ता गणना गर्दा अनुमान गरिएको आम्दानीबीच प्रत्येक शरद ऋतुमा तुलना गर्ने गर्छ। कर विवरणमा देखिएको आम्दानी पहिले अनुमान गरिएको भन्दा फरक परेमा भत्ताको नयाँ हिसाब गरिन्छ, जसलाई नर्वेजियन भाषामा etteroppgjør भनिन्छ।
यस वर्षको हिसाब सन् २०२५ को आम्दानी र अपाङ्गता भत्तासँग सम्बन्धित छ। वर्षभरि सही रकम प्राप्त गरेका करिब ३ लाख ५० हजार व्यक्तिलाई भने कुनै पत्र पठाइने छैन।
औसत २९ हजार क्रोनर फिर्ता तिर्नुपर्ने
NAV को तथ्याङ्कअनुसार करिब १८ हजार ९०० जनाले तोकिएभन्दा बढी भत्ता बुझेका छन्। उनीहरूले औसतमा करिब २९ हजार क्रोनर फिर्ता गर्नुपर्नेछ। रकम फिर्ता गर्नुपर्ने व्यक्तिहरूले पत्रमै आवश्यक रकम, भुक्तानीको समयसीमा र किस्ताबन्दीको सुविधाबारे विस्तृत जानकारी पाउनेछन्।
अर्कोतर्फ, पाउनुपर्ने भन्दा कम भत्ता बुझेका करिब १७ हजार ९०० जनाले NAV बाट औसतमा १७ हजार क्रोनर थप पाउनेछन्।
पत्र नआए के बुझ्ने?
पत्रहरू आजदेखि सबैलाई एकैचोटि नभई चरणबद्ध रूपमा पठाइनेछन्। सन् २०२५ मा सही रकम पाएकालाई पत्र नपठाइने भएकाले, पत्र नआउनुको अर्थ सामान्यतया तपाईंको हिसाब सही छ भन्ने बुझिन्छ। यद्यपि, पत्र प्राप्त गर्ने व्यक्तिले त्यसमा उल्लेखित आम्दानी र अन्य विवरण ध्यानपूर्वक जाँच गर्नुपर्छ। हिसाबमा गल्ती देखिएमा वा गणनामा समावेश नहुनुपर्ने आम्दानी परेको खण्डमा तुरुन्त NAV लाई जानकारी गराउनुपर्छ।
केही आम्दानी गणनाबाट हटाउन सकिन्छ
व्यक्ति अपाङ्ग हुनुअघि गरेको काम वा घटनासँग सम्बन्धित केही रकम वार्षिक हिसाबमा समावेश नहुन पनि सक्छ। उदाहरणका लागि, अपाङ्गता भत्ता स्वीकृत हुनुअघि आर्जन गरिएको बिदाको पैसा (Feriepenger) तथा आम्दानी गुमेबापत प्राप्त केही क्षतिपूर्ति रकमलाई गणनाबाट हटाउन सकिने NAV ले जनाएको छ।
यसअन्तर्गत हिंसापीडितले पाउने क्षतिपूर्ति, उपचारका क्रममा भएको त्रुटिबापतको क्षतिपूर्ति वा कार्यस्थलमा लागेको चोटपटकसम्बन्धी रकम पर्न सक्छन्। यस्ता रकमलाई पनि आम्दानीका रूपमा समावेश गरिएको पाइएमा NAV सँग सम्पर्क गर्नुपर्छ।
नयाँ १ G सीमा यस हिसाबमा लागू हुँदैन
कम्तीमा दुई वर्षदेखि अपाङ्गता भत्ता पाइरहेका केही व्यक्तिका लागि सन् २०२६ देखि आम्दानीको छुट सीमा ०.४ G बाट बढाएर १ G बनाइएको छ। तर, अहिले भइरहेको हिसाब सन् २०२५ को आम्दानीसँग सम्बन्धित भएकाले यसमा उक्त नयाँ सीमा लागू हुँदैन। नयाँ १ G सीमा सन् २०२६ को आम्दानीको हिसाब गर्दा मात्र प्रयोग हुने र त्यसको वार्षिक हिसाब सन् २०२७ को शरद ऋतुमा मात्रै हुने NAV ले स्पष्ट पारेको छ।