ओस्लो — नर्वेमा बसोबास गर्ने विदेशी नागरिकहरूले अब राष्ट्रिय परिचयपत्र (National ID Card) प्राप्त गर्न सक्ने भएका छन्। नर्वेली प्रहरी (Politiet) का अनुसार, युरोपेली संघ (EU), युरोपेली आर्थिक क्षेत्र (EEA) र युरोपेली स्वतन्त्र व्यापार संघ (EFTA) बाहिरका देशका नागरिकहरूले पनि निश्चित सर्तहरू पूरा गरेमा यस राष्ट्रिय परिचयपत्रका लागि आवेदन दिन सक्नेछन्।
गत सेप्टेम्बर १, २०२६ देखि यो सेवा विस्तारको प्रक्रिया सुरु गरिसकिएको प्रहरीले जनाएको छ। सुरुवाती केही महिनामा 'Øst politidistrikt' अन्तर्गतको शी (Ski) स्थित प्रहरी कार्यालयबाट मात्र आवेदन दिन सकिने व्यवस्था मिलाइएको छ। यद्यपि, यसै वर्षको अन्त्यसम्ममा भने देशका अन्य प्रहरी कार्यालयहरूबाट पनि यो सेवा विस्तार गर्दै लैजाने योजना रहेको छ।
कसले दिन सक्छन् आवेदन?
यस परिचयपत्रका लागि आवेदन दिन चाहने व्यक्तिसँग अनिवार्य रूपमा ११ अङ्कको नर्वेली राष्ट्रिय परिचय नम्बर (fødselsnummer) हुनुपर्नेछ। हाल 'D-nummer' मात्र भएका व्यक्तिहरूले भने यस परिचयपत्रका लागि आवेदन दिन सक्ने छैनन्।
यसका साथै, आवेदनकर्ताले निम्न सर्तहरू पूरा गरेको हुनुपर्नेछ:
- आवेदकसँग वैध राहदानी वा नर्वेले स्वीकार गर्ने अन्य आधिकारिक यात्रा कागजात हुनुपर्ने।
- राष्ट्रिय जनसंख्या दर्ता (Folkeregisteret) मा रहेको नाम र अन्य व्यक्तिगत विवरणहरू आधिकारिक कागजातसँग हुबहु मिल्नुपर्ने।
प्रहरीले परिचय प्रमाणीकरणका लागि कडा सर्त राखेको जनाएको छ। राहदानी म्याद सकिएको, क्षतिग्रस्त भएको, हराएको वा त्यसको चिपले काम नगर्ने अवस्थामा आवेदन दिनुअघि नयाँ राहदानी लिनुपर्ने हुन सक्छ।
अस्थायी बसोबास अनुमति भएका व्यक्तिको राष्ट्रिय परिचयपत्रको म्याद सामान्यतया बसोबास कार्ड (oppholdskort) को म्यादसँग मिल्ने गरी निर्धारण गरिने प्रहरीले जनाएको छ। त्यसैले आवेदन दिनुअघि आफ्नो बसोबास कार्डको म्याद जाँच गर्न सुझाव दिइएको छ।
किन उपयोगी छ यो परिचयपत्र?
राष्ट्रिय परिचयपत्र बनाउनु अनिवार्य नभए तापनि यो नर्वेभित्र आफ्नो पहिचान प्रमाणित गर्न निकै भरपर्दो र उपयोगी माध्यम हो। यसले धारकको नर्वेली राष्ट्रिय परिचय नम्बर (fødselsnummer) लाई आधिकारिक रूपमा प्रमाणित गर्छ।
बैंक खाता खोल्न वा वित्तीय कारोबार गर्न, सार्वजनिक कार्यालयहरूमा सेवा लिन, फार्मेसीमा औषधि खरिद गर्न वा अन्य सेवाहरू प्रयोग गर्दा यसलाई आधिकारिक पहिचान का रूपमा प्रयोग गर्न सकिन्छ