नर्वेको पूर्वी र पश्चिमी क्षेत्र जोड्ने प्रमुख मार्गमध्ये एक, हेम्सेदाल्सफ्येले (Hemsedalsfjellet) हुँदै जाने राष्ट्रिय सडक ५२ (Rv. 52) निश्चित समयमा दैनिक साढे १३ घण्टासम्म बन्द हुने भएको छ। बुधबार, २१ अक्टोबर २०२६ देखि १७ डिसेम्बरसम्म लागू हुने यो व्यवस्थाबारे नर्वेको सडक निकाय (Statens vegvesen) ले सूचना सार्वजनिक गरेको हो।
सडक बन्द हुने स्थान पहाडी मार्गको पूर्वतर्फ रहेको स्टोरेस्कार (Storeskar) हो। त्यहाँ सडक सुधारका लागि चट्टान विस्फोट गराउने र त्यसपछि ढुंगामाटो हटाउने काम हुने भएकाले कामदार तथा यात्रुको सुरक्षाका लागि आवागमन रोक्न लागिएको निकायले जनाएको छ।
कुन समयमा बन्द हुन्छ?
घोषित तालिकाअनुसार सोमबारदेखि शनिबारसम्म दिउँसो दुईपटक सडक बन्द हुनेछ:
- बिहान ०९:०० देखि ११:०० बजेसम्म
- दिउँसो १४:३० देखि १६:०० बजेसम्म
यसका अतिरिक्त सोमबारदेखि शुक्रबारसम्म राति २०:०० बजेदेखि भोलिपल्ट बिहान ०६:०० बजेसम्म पनि सडक पूर्ण रूपमा बन्द हुनेछ। शनिबार राति र आइतबार भने सडक बन्द गरिने छैन।
यसअनुसार शनिबार अपराह्न ४ बजेदेखि सोमबार बिहान ९ बजेसम्म यो निर्माणकार्यका लागि निर्धारित बन्द लागू हुनेछैन।
बन्द अवधिमा सामान्य सवारीसाधनले पार गर्न पाउने छैनन्। आपत्कालीन सेवा र भी बुस (Vy Buss) लाई आवश्यकताअनुसार पार गराउने विषयमा भने सम्बन्धित पक्षसँग समन्वय भइरहेको सडक निकायले जनाएको छ।
नजिकै घुमेर जाने वैकल्पिक बाटो छैन
स्टोरेस्कार (Storeskar) मा सडक बन्द हुँदा नजिकैबाट घुमेर अर्को छेउ पुग्ने स्थानीय वैकल्पिक बाटो (Omkjøring) छैन। त्यसैले चालकले बन्द स्थानसम्म पुगेपछि मात्र विकल्प खोज्नुभन्दा पहिल्यै मार्ग रोज्नुपर्नेछ।
वैकल्पिक मार्गका रूपमा राष्ट्रिय सडक ७ हुँदै हार्दाङ्गेरभिद्दा (Rv. 7 Hardangervidda) वा E16 हुँदै फिलेफ्येल (E16 Filefjell) प्रयोग गर्न सुझाइएको छ।
पूर्वबाट आउने चालकले हनेफोस (Hønefoss) वा ढिलोमा गोल (Gol) पुग्दा मार्ग रोजिसक्नुपर्नेछ। पश्चिमबाट आउनेले भोस (Voss) वा ढिलोमा बोर्लाउग (Borlaug) मा निर्णय गर्नुपर्ने सडक निकायले जनाएको छ।
नोभेम्बरदेखि अर्को सुरुङ पनि राति बन्द हुने
यात्रा योजनालाई थप असर पार्ने गरी १६ नोभेम्बरदेखि E16 को ल्यार्दाल सुरुङ (Lærdalstunnelen) पनि सातामा छ दिन साँझ १८:०० बजेदेखि बिहान ०६:०० बजेसम्म बन्द हुनेछ। शनिबार साँझदेखि आइतबार बिहानसम्म भने उक्त रात्री बन्द लागू हुनेछैन।
दुवै मार्ग बन्द हुने साँझ र रातको समयमा पूर्व–पश्चिम यात्रा गर्नेका लागि राष्ट्रिय सडक ७ हार्दाङ्गेरभिद्दा (Rv. 7 Hardangervidda) वा E134 हाउकेली (E134 Haukeli) विकल्प हुन सक्छन्।
उत्तरी भेस्टलान (Nord-Vestland) तर्फ जाने वा त्यहाँबाट आउनेका लागि E6 र राष्ट्रिय सडक १५ स्त्रिनेफ्येल (Rv. 15 Strynefjellet) हुँदै जाने विकल्प पनि निकायले उल्लेख गरेको छ।
यात्रा गर्नुअघि पछिल्लो सूचना हेर्नुहोस्
सडक निकायले यात्रा सुरु गर्नुअघि Vegvesen trafikk एप वा आफ्नो ट्राफिक सूचना वेबसाइटमा बन्द हुने समय र वैकल्पिक मार्ग जाँच्न आग्रह गरेको छ।
एपमा निश्चित सडक, सुरुङ वा पहाडी मार्गका लागि सूचना (Push-varsel) आउने व्यवस्था मिलाउन सकिन्छ।