सवारी चालक अनुमति पत्र: नयाँ लिने वा विदेशी लाइसेन्स साट्ने गाइड

नर्वेमा कार (Klasse B) चलाउन पहिलोपटक लाइसेन्स (førerkort) लिने वा विदेशी लाइसेन्स साट्ने नियमहरू फरक-फरक हुन्छन्। नयाँ ड्राइभिङ लाइसेन्स लिनका लागि तपाईंले अनिवार्य तालिमसहित पर्याप्त गाडी चलाउने अभ्यास गर्नुपर्छ, लिखित परीक्षा (थ्योरी) पास गर्नुपर्छ र अन्त्यमा ट्रायल अर्थात् प्रयोगात्मक परीक्षा उत्तीर्ण गर्नुपर्छ।

विदेशी लाइसेन्स साट्ने वा चलाउन पाउने अवधि त्यो कुन देशबाट जारी भएको हो भन्ने कुरामा निर्भर गर्छ। तपाईंसँग कुनै लाइसेन्स नभएको, EU/EØS भित्रको वा नेपालजस्तो EU/EØS बाहिरको लाइसेन्स भएको अवस्थामा छुट्टाछुट्टै नियमहरू लागू हुन्छन्।

नयाँ नर्वेजियन लाइसेन्स लिने प्रक्रिया

पहिलोपटक नर्वेजियन लाइसेन्स लिन Statens vegvesen को 'Din side' बाट आवेदन दिनुपर्छ। आवेदन दिएपछि प्रहरीले तपाइको चारित्रिक जाँच (vandelskontroll) गर्छ, जसमा २ देखि ४ हप्ता लाग्न सक्छ र oppkjøring अघि यो स्वीकृत हुनैपर्छ।

आवश्यकताअनुसार मेडिकल रिपोर्ट (helseattest) वा आँखा जाँचको रिपोर्ट (synsattest) पनि बुझाउनुपर्ने हुन सक्छ र आवेदक नर्वेको स्थायी बासिन्दा हुनुपर्छ।

२५ वर्षभन्दा कम उमेरकाले अभ्यास (øvelseskjøring) सुरु गर्नुअघि १७ घण्टाको 'trafikalt grunnkurs' पूरा गर्नुपर्छ। तर, २५ वर्ष काटिसकेकाहरूले भने प्राथमिक उपचार र अँध्यारोमा गाडी चलाउने तालिम मात्र लिए पुग्छ।

ड्राइभिङ अभ्यास (øvelseskjøring) र परीक्षाको तयारी

निजी रूपमा ड्राइभिङ अभ्यास गर्दा सिक्ने व्यक्ति कम्तीमा १६ वर्ष र सिकाउने व्यक्ति कम्तीमा २५ वर्ष पुगेको हुनुका साथै सिकाउनेसँग पछिल्लो ५ वर्षदेखि लगातार लाइसेन्स भएको हुनुपर्छ। अभ्यास गर्ने कारको पछाडि रातो 'L' चिन्ह र अतिरिक्त ऐना अनिवार्य छ।

यदि तपाईंले अटोमेटीक गियर भएको कारमा oppkjøring (प्रयोगात्मक परीक्षा) दिनुभयो भने लाइसेन्समा 'kode 78' उल्लेख हुन्छ, जसले अटोमेटीक मात्र चलाउन अनुमति दिन्छ। सबै अनिवार्य तालिम Statens vegvesen को प्रणालीमा दर्ता भइसकेपछि र आवेदन स्वीकृत भएपछि थ्यो‍री परीक्षा (teoriprøve) दिन सकिन्छ।अन्त्यमा, सबै प्रक्रिया पूरा भएपछि ट्राफिक स्टेसनमा प्रयोगात्मक परीक्षा (ट्रायल) हुन्छ। जहाँ गाडी तयार गर्ने, सुरक्षा जाँच गर्ने र स्वतन्त्र रूपमा गाडी चलाउने सीपको परीक्षण गरिन्छ।

विदेशी र नेपाली लाइसेन्स को नियम

EU/EØS बाहिर (जस्तै नेपाल) बाट जारी भएको मान्य लाइसेन्स नर्वेमा स्थायी बसोबास दर्ता भएको मितिले सामान्यतया तीन महिनासम्म मात्र प्रयोग गर्न पाइन्छ। तर, अस्थायी रूपमा बस्ने र तीन महिनाभन्दा लामो अवधिको आवासीय अनुमति र रोजगार सम्झौता भएका व्यक्तिहरूले भने केही अवस्थामा छ महिनासम्म पनि गाडी चलाउन पाउँछन्।।

फोटो वा ल्याटिन लिपि नभएको अवस्थामा अन्तर्राष्ट्रिय लाइसेन्स पनि साथमै राख्नुपर्छ। नेपाल प्रत्यक्ष लाइसेन्स साट्न मिल्ने देशहरूको सूचीमा नपरेकोले नेपाली लाइसेन्स सीधै नर्वेजियन लाइसेन्समा साट्न मिल्दैन। तोकिएको अवधि सकिएपछि तपाईंले नयाँ आवेदककै रूपमा सम्पूर्ण प्रक्रिया पूरा गरेर नर्वेजियन लाइसेन्स लिनुपर्छ।

EU/EØS देशको लाइसेन्स साट्ने नियम

EU/EØS भित्रका देशबाट जारी भएको मान्य लाइसेन्स भने सामान्यतया नयाँ परीक्षा नदिईकनै साट्न सकिन्छ। तर, यदि त्यो लाइसेन्स मूल रूपमा नेपाल वा अन्य गैर-EU/EØS देशको लाइसेन्स साटेर प्राप्त गरिएको हो भने, त्यसलाई नर्वेले स्वतः साधारण EU/EØS लाइसेन्स सरह मान्यता दिँदैन र थप मूल्याङ्कन गर्छ।

नेपाली लाइसेन्स भएका व्यक्तिका लागि छोटो निष्कर्ष

• नेपाली लाइसेन्स नर्वेजियन लाइसेन्ससँग सीधै साट्न पाइँदैन।
• मान्य नेपाली लाइसेन्स सीमित अवधिसम्म नर्वेमा प्रयोग गर्न मिल्न सक्छ।
• प्रयोग गर्न पाइने अवधि नर्वे प्रवेश गरेको मिति, स्थायी बसोबास दर्ता र रोजगारसम्बन्धी अवस्थाले निर्धारण गर्न सक्छ।
• अवधि समाप्त भएपछि नर्वेजियन लाइसेन्स को प्रक्रिया पूरा नगरी गाडी चलाउनु हुँदैन।
• अर्को EU/EØS देशमा साटिएको नेपाली लाइसेन्स नर्वेमा स्वतः साधारण EU/EØS लाइसेन्स सरह मान्य हुन्छ भन्ने हुँदैन।
• आफ्नो व्यक्तिगत अवस्थाबारे शङ्का भए Statens vegvesen बाट पुष्टि लिनुपर्छ।