नेपालबाट नर्वे आउँदा के–कस्ता सामान ल्याउन पाइन्छ?

नेपालबाट नर्वे आउँदा कपडा र व्यक्तिगत सामानसँगै मसला, अचार, औषधि, उपहार, गहना वा नगद पैसा पनि ल्याउने गरिन्छ। तर विमान कम्पनीले झोलामा राख्न दिएको सबै वस्तु नर्वे प्रवेश गराउन मिल्छ भन्ने हुँदैन। सामानको प्रकार, मूल्य र परिमाणका आधारमा नर्वेको भन्सार तथा खाद्यसम्बन्धी नियम पालना गर्नुपर्छ।

यो गाइड नेपालबाट हवाई यात्रामा आफ्नो झोलामा सामान लिएर नर्वे आउने व्यक्तिका लागि हो। ठूलो परिमाणमा घरायसी सामान पठाउने वा स्थायी रूपमा बसाइँ सर्दा ल्याइने सामानका लागि छुट्टै नियम लागू हुन सक्छ।

विमानको सामान सीमा र भन्सार नियम एउटै होइन

विमान कम्पनीले मुख्यतः सामानको तौल, आकार, सुरक्षा र हाते झोलामा राख्न मिल्ने वस्तु हेर्छ, जसअनुसार २३, २५, ३० वा ४६ किलो सामान ल्याउन पाइन्छ। तर नर्वे प्रवेश गर्दा सामानको प्रकार, मात्रा, मूल्य र आवश्यक अनुमति जाँच गरिन्छ। झोला तोकिएको तौलभित्र भए पनि नर्वेमा ल्याउन निषेध गरिएको वस्तु जफत हुन सक्छ।

व्यक्तिगत प्रयोगका सामान

आफूले प्रयोग गरिरहेको कपडा, जुत्ता, मोबाइल, ल्यापटप, क्यामेरा र यात्राका लागि आवश्यक सामान्य व्यक्तिगत सामान ल्याउन प्रायः समस्या हुँदैन। तर नेपालमा नयाँ मोबाइल, कम्प्युटर, गहना वा अन्य महँगो सामान किनेर नर्वे ल्याइएको हो भने त्यसको मूल्य भन्सारको सीमाभित्र पर्छ कि पर्दैन भन्ने हेर्नुपर्छ। नयाँ सामानलाई पुरानो देखाउन प्याकेट वा बिल फाल्नु सुरक्षित उपाय होइन, किनभने अधिकारीले सामान कहाँ र कहिले किनेको हो भन्ने प्रमाण माग्न सक्छन्।

नर्वेमा नबस्ने यात्रुले आफ्नो बसाइमा प्रयोग गरेर फेरि बाहिर लैजाने व्यक्तिगत सामानमा भने सामान्य मूल्य सीमा लागू हुँदैन। तर नर्वेमै छोडिने उपहार वा उपभोग गरिने सामानमा भने मूल्य सीमा लागू हुन्छ।

नयाँ सामान र उपहारको मूल्य सीमा

विदेशमा २४ घण्टाभन्दा बढी बसेर नर्वे आएको व्यक्तिले सामान्यतया कुल ६ हजार नर्वेजियन क्रोनरसम्म मूल्यका सामान कर नतिरी ल्याउन सक्छ।

विदेशमा बसाइ २४ घण्टा वा त्यसभन्दा कम भए यो सीमा ३ हजार क्रोनर हुन्छ। यो सीमा एउटा सामानका लागि मात्र नभई विदेशमा किनेका र नर्वेमा राखिने सबै सामानको कुल मूल्यका लागि हो।

एउटै सामानको मूल्य ६ हजार क्रोनरभन्दा बढी छ भने ६ हजार घटाएर बाँकी रकममा मात्र कर तिर्न पाइँदैन, पूरै मूल्यमा कर लाग्छ। अधिकांश सामानमा २५ प्रतिशत भ्याट र केहीमा अतिरिक्त भन्सार शुल्क लाग्न सक्छ।

नेपालमा किनेको नयाँ सामान वा सुनका गहनाको बिल सँगै राख्नु राम्रो हुन्छ, नत्र अधिकारीले मूल्य आफैँ निर्धारण गर्न सक्छन्। उपहार पाएको सामान पनि निःशुल्क मानिँदैन र यसको बजार मूल्यलाई आधार मानिन्छ।

रक्सी र सुर्ती भने यो मूल्य सीमाभित्र पर्दैनन्, तिनका लागि छुट्टै कोटा हुन्छ।

नेपालबाट ल्याइने खानेकुरा

नेपाल युरोपेली क्षेत्र (EU/EØS) बाहिर पर्ने भएकाले खानेकुरासम्बन्धी नियम कडा छन्। सामान सानो परिमाणमा छ वा घरमै बनाइएको हो भन्दैमा छुट पाइँदैन। निजी प्रयोगका लागि चामल, दाल, चिया, कफी, सुक्खा मसला, बिस्कुट, मिठाई र चाउचाउजस्ता केही प्रशोधित खाद्यवस्तु ल्याउन सकिन्छ।

विशेषगरी रोटी, केक, बिस्कुट, चकलेट, मिठाई तथा मासु नभरिएको पास्ता वा चाउचाउजस्ता प्रशोधित वस्तुमा दूध, अण्डा वा अन्य पशुजन्य सामग्रीको अंश भए पनि ल्याउन छुट छ। यस्ता वस्तु कोठाको सामान्य तापक्रममा सुरक्षित रहने, पर्याप्त रूपमा पकाइएको, राम्रोसँग प्याक गरिएको र खानका लागि बनाइएको भनेर स्पष्ट चिनिने हुनुपर्छ।

सम्भव भएसम्म खानेकुरा मूल प्याकेटमै राख्नुहोस् जसले गर्दा जाँचका क्रममा सामग्रीको विवरण बुझाउन सजिलो हुन्छ।

मासु र दूधबाट बनेका खानेकुरा नल्याउनुहोस्

नेपालबाट व्यक्तिगत झोलामा मासु, मासुबाट बनेका वस्तु, दूध तथा दुग्धजन्य पदार्थ ल्याउन पूर्ण रूपमा प्रतिबन्धित छ।

प्याकेट बन्द भएको सामान वा घरमै बनाएको खानेकुरा भए पनि यो नियम कडाइका साथ लागू हुन्छ। त्यसैले सुकुटी वा सुकाएको मासु, मासुको अचार, ससेज, दूध, दही, पनिर, चिज, घिउ, खुवा वा दुग्धजन्य मिठाई ल्याउनु हुँदैन।

सामग्रीको विवरण नभएको अचार वा मिश्रित खानेकुरामा के छ भनेर प्रमाणित गर्न कठिन हुने भएकाले यस्ता कुरा नल्याउनु नै सुरक्षित हुन्छ।

माछा, मह र अण्डा

मासु र दूधबाहेक माछा, समुद्री खानेकुरा, मह र अण्डाजस्ता अन्य पशुजन्य खानेकुरा कुल एक किलोसम्म ल्याउन सकिन्छ। तर मासु वा दूध मिसिएको उत्पादनलाई भने यो एक किलोको छुट लागू हुँदैन।

शिशुको खाना र उपचारका लागि आवश्यक विशेष खाना

नेपालबाट आफ्नो प्रयोगका लागि शिशुको दूध, बच्चाको खाना र चिकित्सकीय कारणले आवश्यक पर्ने विशेष खाना कुल दुई किलोसम्म ल्याउन सकिन्छ। यस्ता सामान खोल्नुअघि फ्रिजमा राख्न नपर्ने, व्यावसायिक रूपमा प्याक गरिएको र सामान्यतया नखोलिएको हुनुपर्छ।

अचार, गुन्द्रुक र मसला ल्याउँदा

नेपालबाट ल्याइने अचारमा मासु, घिउ वा अन्य दुग्धजन्य सामग्री मिसिएको हुनु हुँदैन। वनस्पतिजन्य तेल, मसला र तरकारीबाट बनेको अचार ल्याउँदा राम्रोसँग बन्द गरिएको प्याकेट रोज्नुपर्छ। घरमै बनाइएको अचारमा सामग्रीको विवरण नभए जाँचका क्रममा बुझाउन कठिन हुन सक्छ।

सुकाएको गुन्द्रुक, दाल, चामल र मसला सामान्यतया प्रतिबन्धमा पर्दैनन्, तर ठूलो परिमाणमा ल्याउँदा निजी यात्रुको नियम लागू नहुन सक्छ।

फलफूल, तरकारी, आलु, बिरुवा र बीउ

निजी प्रयोगका लागि बढीमा १० किलो ताजा फलफूल, बेरी वा तरकारी ल्याउन सकिन्छ, तर त्यसमा रोग वा किरा लागेको हुनु हुँदैन।

काँचो आलु ल्याउन वनस्पति स्वास्थ्य प्रमाणपत्र आवश्यक पर्छ भने खेती गर्न प्रयोग गरिने आलुको बीउ ल्याउन निषेध छ। आलु चिप्स वा पूर्ण रूपमा प्रशोधित उत्पादनमा भने यो नियम लागू हुँदैन।

नेपालबाट गमलासहितको बिरुवा सजिलै ल्याउन पाइँदैन। बिरुवा, हाँगा, कलमी, माटो वा फूलको माला ल्याउँदा वनस्पति स्वास्थ्य प्रमाणपत्र वा विशेष अनुमति आवश्यक पर्न सक्छ।

औषधि ल्याउँदा

आफ्नो उपचारका लागि आवश्यक औषधि बढीमा तीन महिनालाई पुग्ने परिमाणसम्म ल्याउन पाइन्छ। औषधि आफ्नै उपचारका लागि भएको प्रमाणित गर्न डाक्टरको प्रेस्क्रिप्सन, फार्मेसीको लेबल वा रसिद साथमा हुनुपर्छ। औषधिलाई सम्भव भएसम्म प्रयोगकर्ताको नाम र सक्रिय तत्व स्पष्ट देखिने मूल प्याकेटमै राख्नुपर्छ।

लागूऔषध मानिने तत्त्व भएका औषधि, कडा दुखाइ कम गर्ने औषधि, निद्रा लगाउने औषधि र डोपिङ सूचीमा पर्ने औषधिका लागि छुट्टै तथा कडा नियम हुन्छ, जुन सामान्यतया ३० दिनलाई मात्र पुग्ने परिमाणमा सीमित हुन्छ। यस्ता औषधि ल्याउँदा भन्सारको रातो च्यानल प्रयोग गर्नुपर्ने हुन सक्छ।

नगद पैसा ल्याउँदा

नर्वेजियन वा विदेशी मुद्रा गरी कुल २५ हजार नर्वेजियन क्रोनरभन्दा बढी नगद ल्याउँदै हुनुहुन्छ भने भन्सारमा घोषणा फाराम भरेर रातो च्यानल प्रयोग गर्नुपर्छ। यो रकम ल्याउनु गैरकानुनी होइन र कर पनि तिर्नुपर्दैन, तर घोषणा नगरी ल्याएको भेटिएमा सम्पूर्ण रकमको २० प्रतिशत जरिवाना लाग्न सक्छ वा शंकास्पद लागेमा प्रहरीलाई बुझाउन सकिन्छ। पैसा कानुनी स्रोतबाट प्राप्त भएको प्रमाण (जस्तै: बैंकको रसिद) साथमा राख्नु राम्रो हुन्छ।

सुन र गहना

आफूले पहिलेदेखि प्रयोग गरिरहेको सामान्य गहना व्यक्तिगत सामानका रूपमा ल्याउन पाइन्छ। तर नेपालमा नयाँ किनेर ल्याएको वा नर्वेमा उपहार दिन ल्याएको सुन तथा गहना नयाँ सामानको ६ हजार क्रोनर मूल्य सीमाभित्र पर्छ। मूल्य सीमा नाघेमा घोषणा गर्नुपर्ने हुन्छ, त्यसैले गहनाको बिल साथमै राख्नुहोस्।

परिवारका धेरै सदस्यबीच एउटै गहनालाई टुक्र्याएर अलग-अलग व्यक्तिको छुटभित्र राख्न मिल्दैन।

रक्सी, चुरोट र सुर्ती

रक्सी र सुर्तीका लागि नयाँ सामानको मूल्य सीमा लागू हुँदैन, यिनका लागि छुट्टै करमुक्त कोटा हुन्छ। सुर्ती वा २२ प्रतिशतसम्म अल्कोहल भएको पेय ल्याउन कम्तीमा १८ वर्ष र त्यो भन्दा कडा (६० प्रतिशतसम्म) रक्सी ल्याउन २० वर्ष पुगेको हुनुपर्छ।

रक्सी र सुर्तीको कोटा सामानको संयोजनअनुसार फरक हुन्छ, जसलाई यात्राअघि Kvoteappen प्रयोग गरेर जाँच गर्न सकिन्छ।

विशेष अनुमति चाहिन सक्ने सामान

हतियार, विस्फोटक पदार्थ, निषेधित रसायन, दुर्लभ जनावरका अंग र ऐतिहासिक महत्त्वका वस्तुहरू झोलामा राखेर सामान्य सामानजस्तो ल्याउनु हुँदैन।

यस्ता वस्तुहरू ल्याउन विशेष नियम तथा अनुमति अनिवार्य हुन्छ। पुरानो मूर्ति वा कलाकृति ल्याउँदा नेपालबाट निर्यात अनुमतिपत्र लिएको हुनुपर्छ र रातो बाटो प्रयोग गर्नुपर्छ।

हरियो र रातो च्यानल

तपाईंसँग घोषणा गर्नुपर्ने कुनै सामान छैन, सबै सामान मूल्य र परिमाण सीमाभित्र छन्, र निषेधित वस्तु छैनन् भने हरियो च्यानल प्रयोग गर्न सक्नुहुन्छ। तर मूल्य सीमा नाघेको, रक्सी/सुर्तीको कोटा नाघेको, २५ हजार क्रोनरभन्दा बढी नगद भएको, विशेष अनुमति चाहिने वा नियमबारे शंका भएको अवस्थामा अनिवार्य रूपमा रातो च्यानल प्रयोग गर्नुहोस्। शंका लागेर पनि हरियो बाटो प्रयोग गर्दा सामान जफत वा जरिवाना हुन सक्छ।

Kvoteappen को प्रयोग

Tolletaten को Kvoteappen प्रयोग गरेर सामान कोटा र मूल्य सीमाभित्र छ कि छैन जाँच गर्न सकिन्छ। सीमा नाघेको केही सामानको शुल्क एपबाट तिर्न पनि सकिन्छ।

एपबाट शुल्क तिरेको रसिद सामान्यतया सक्रिय भएको समयदेखि दुई घण्टासम्म मान्य हुन्छ। केही अवस्थामा यात्रा गर्नुभन्दा बढीमा ४८ घण्टाअघि पनि घोषणा गर्न सकिन्छ।

एपबाट कानुनी बनाउन नसकिने निषेधित वस्तु ल्याउन भने पाइँदैन। एपबाट शुल्क तिर्न मिल्नु र कुनै वस्तु नर्वेमा ल्याउन कानुनी हुनु फरक कुरा हुन्

झोला बन्द गर्नुअघि यी कुरा जाँच गर्नुहोस्:

• मासु, सुकुटी वा मासुको अचार त छैन?
• घिउ, दूध, पनिर वा अन्य दुग्धजन्य वस्तु त छैन?
• औषधि मूल प्याकेटमा छ?
• औषधिको प्रेस्क्रिप्सन वा डाक्टरको पत्र छ?
• नयाँ र महँगा सामानको बिल छ?
• नगद २५ हजार नर्वेजियन क्रोनरभन्दा बढी त छैन?
• नयाँ सामानको कुल मूल्य ६ हजार क्रोनर नाघेको त छैन?
• अचार वा प्याकेटमा रहेको खानेकुराको सामग्री स्पष्ट छ?
• काँचो आलु, बिरुवा, माटो वा रोप्न प्रयोग गरिने सामग्री त छैन?
• ल्याउन मिल्छ कि मिल्दैन भन्ने शंका भएको कुनै वस्तु छ?

अन्तिम प्रश्नको उत्तर “छ” हो भने रातो च्यानल प्रयोग गर्नुहोस् वा यात्राअघि सम्बन्धित निकायसँग सोध्नुहोस्।

नियम परिवर्तन हुन सक्छ

खाद्यवस्तु, बिरुवा, पशुजन्य उत्पादन र औषधिका नियम रोग, संक्रमण वा अन्य जोखिमका कारण अस्थायी रूपमा परिवर्तन हुन सक्छन्।

पुरानो सामाजिक सञ्जाल पोस्ट वा चिनजानको अनुभवलाई मात्र आधार नबनाउनुहोस्।

यात्रा गर्नुअघि Tolletaten, Mattilsynet र औषधिका लागि Direktoratet for medisinske produkter को अद्यावधिक जानकारी जाँच गर्नु सुरक्षित हुन्छ।